பிரசித்தி பெற்ற யாழ்.வடமராட்சி ஸ்ரீவல்லிபுர ஆழ்வார் ஆலயத் தேர்த்திருவிழாவை முன்னிட்டு இலங்கை முதலுதவிச்சங்க இந்துசமயத் தொண்டர் சபை யாழ்ப்பாணம் சின்மயா மிஷன் சுவாமிகளின் ஆலோசனைக்கமைய நடைபெறும் புனித திருத்தலப் பாதயாத்திரை இன்று வெள்ளிக்கிழமை(11) காலை-08.30 மணியளவில் வரலாற்றுச் சிறப்பு மிக்க நல்லூர்க் கந்தசுவாமி ஆலயத்தில் ஆரம்பமாகியது.

இலங்கை மணித்திருநாட்டில் நிரந்தர சாந்தி சமாதானம் இனங்களுக்கிடையே பேதங்கள் நீங்கி ஒற்றுமை வளர இறையருள் வேண்டி மேற்படி பாதயாத்திரை முன்னெடுக்கப்படுகிறது.

இந்தப் பாதயாத்திரையை யாழ்ப்பாணம் சின்மயாமிஷன் நிலையத்தின் தலைவர் சிதாகாசானந்தா சுவாமிகள் கலந்து கொண்டு ஆரம்பித்து வைத்தார்.

சிவலிங்கம் தாங்கிய ஊர்தியின் முன்னே சிவனடியார்கள் நடைபயணமாக இறைவன் புகழ்பாடியவாறு குறித்த பாதயாத்திரையில் கலந்து கொண்டுள்ளனர். பாதயாத்திரையில் கலந்து கொண்ட சில அடியவர்கள் பக்தி மேலீட்டால் ஆடியும் பாடியும் கலந்து கொண்டமை பார்ப்போரைப் பரவசத்தில் ஆழ்த்தியுள்ளது.

அத்துடன் முதுமையையும் பொருட்படுத்தாது மூத்தோர்கள் சிலரும் பாதயாத்திரையில் உற்சாகமாக கலந்து கொண்டுள்ளனர்.

பாதயாத்திரையில் கலந்து கொள்ளும் சிவனடியார்கள் வீதியோரமாகவுள்ள ஆலயங்களைத் தரிசித்தவாறு பாதயாத்திரையைத் தொடர்ந்து வருகின்றனர்.

இன்று மதியம் நீர்வேலிக் கந்தசுவாமி ஆலயத்தில் பாதயாத்திரையில் கலந்து கொண்ட அடியவர்கள் அனைவருக்கும் அன்னதானம் பரிமாறப்பட்டது.

பாதயாத்திரை தற்போது இரவிரவாகவும் முன்னெடுக்கப்பட்டு வருகிறது.

இந்நிலையில் வல்லிபுர ஆழ்வார் தேர்த்திருவிழாவான நாளை சனிக்கிழமை(12) காலை குறித்த பாதயாத்திரைக் குழுவினர் வல்லிபுர ஆழ்வார் ஆலயத்தைச் சென்றதடைவர்.

வரலாற்றுப் பிரசித்திபெற்ற யாழ்.தெல்லிப்பழை ஸ்ரீ துர்க்காதேவி தேவஸ்தான வருடாந்த மஹோற்சவப் பெருவிழாவின் தேர்த்திருவிழா இன்று செவ்வாய்க்கிழமை(10) காலை சிறப்பாக இடம்பெற்றது.

காலை-07.30 மணியளவில் வசந்தமண்டபப் பூசைகள் இடம்பெற்றதைத் தொடர்ந்து பட்டாடைகள் ஜொலி ஜொலிக்க அலங்கார நாயகியாக துர்க்காதேவி மெல்ல மெல்ல அசைந்தாடி உள்வீதி வலம் வந்தாள்.

அதனைத் தொடர்ந்து அடியவர்களின் அரோகராக் கோஷத்தின் மத்தியில் அம்பாள் திருத்தேரில் ஆரோகணித்தார். தேவஸ்தானத் தலைவர் செஞ்சொற்செல்வர் கலாநிதி ஆறு. திருமுருகன் தேர்த் திருவிழா சிறப்புரை ஆற்றியதைத் தொடர்ந்து தடையின்றித் திருத்தேர் பவனி வரும் வகையில் சேந்தனார் அருளிய திருப்பல்லாண்டு ஓதப்பட்டது.

விசேட தீபாராதனைகள் இடம்பெற்றதைத் தொடர்ந்து பல்லாயிரக்கணக்கான அடியவர்கள் புடைசூழ, அடியவர்களின் அரோகராக் கோஷம் முழங்க காலை-09.30 மணியளவில் திருத்தேர் பவனி ஆரம்பமாகியது.

ஆண் அடியவர்கள் ஒருபுறமும், பெண் அடியவர்கள் மறுபுறமும் திருத்தேரின் வடம் தொட்டிழுக்க அம்பாள் திருத்தேரில் பவனி வந்த காட்சி வார்த்தைகளுக்கு அப்பாற்பட்ட அழகுத் திருக்காட்சி.

அம்பாள் திருத்தேரில் பவனி வந்த போது பல நூற்றுக்கணக்கான ஆண் அடியவர்கள் அங்கப் பிரதட்சணை எடுத்தும், பெண் அடியவர்கள் அடியளித்தும், பாற்காவடிகள் எடுத்தும் நேர்த்திக்கடன்களை நேர்த்தியுடன் நிறைவேற்றினர். அத்துடன் திருத்தேரின் பின்பாக அடியவர்கள் பலரும் அம்பாள் பஜனைப் பாடல்களைப் பண்ணுடன் ஓதியவாறு வலம் வந்தனர்.

திருத்தேர் பவனி வந்த போது பல அடியவர்கள் அழுதும் தொழுதும் துர்க்காதேவியை மெய்யுருக வழிபட்டனர். திருத்தேர் பவனி முற்பகல்-10.30 மணியளவில் மீண்டும் இருப்பிடத்தை வந்தடைந்ததைத் தொடர்ந்து அடியவர்கள் அர்ச்சனை செய்து வழிபாடாற்றினர்.

திருத்தேர் பவனி வரும் வேளையில் தேவஸ்தான திருமுறை மடத்தில் யாழ்.குடாநாட்டின் புகழ்பூத்த வித்துவான்கள் மற்றும் ஓதுவார்களின் திருமுறை இசைக்கச்சேரி சிறப்புற இடம்பெற்றது.

தேர்த்திருவிழாவை முன்னிட்டு யாழ்.குடாநாட்டின் பல பாகங்களிலிருந்தும் பறவைக்காவடிகள், தூக்குக் காவடிகள் எடுத்தும் பல எண்ணிக்கையான ஆண் அடியவர்கள் தொடர்ந்தும் நேர்த்திக்கடன்களை நிறைவேற்றி வருகின்ற காட்சி பக்திப் பரவசத்தை ஏற்படுத்துவதாய் அமைந்துள்ளது.

இவ்வாலயத் தேர்த் திருவிழாவில் யாழ்.குடாநாட்டின் பல பாகங்களிலிருந்து மாத்திரமல்லாமல் வெளி மாவட்டங்களிலிருந்தும், புலம்பெயர் தேசங்களிலிருந்தும் வருகை தந்த பல்லாயிரக்கணக்கான அடியவர்கள் பக்திப் பெருக்குடன் கலந்து கொண்டுள்ளனர்.

தேர்த்திருவிழாவில் கலந்து கொண்டுள்ள அடியவர்களை ஒழுங்குபடுத்தும் நடவடிக்கையில் சாரணர்கள், ஆலயத் தொண்டர்கள் ஆகியோர் ஈடுபட்டுள்ளனர்.

அத்துடன் தேர்த்திருவிழாவுக்கு வருகை தந்துள்ள அடியவர்களின் நன்மை கருதி தேவஸ்தான அன்னதான மண்டபத்தில் அன்னதான ஏற்பாடுகள் மேற்கொள்ளப்பட்டுள்ளன. அத்துடன் கடும் வெயிலுக்கு மத்தியில் களைப்புடன் செல்லும் அடியவர்களின் தாகத்தைத் தீர்க்கும் வகையில் ஆலயச் சூழலிலும், ஆலயத்திற்குச் செல்லும் வீதிகள் தோறும் தாகசாந்தி நிலையங்கள் அமைக்கப்பட்டுப் பானங்கள் பரிமாறப்பட்டு வருகின்றமையும் இங்கு குறிப்பிடத்தக்கது.